ТӮЙ ДАР ХОРУҒШАҲР

Душанбе, 5 июл.(АМИТ «Ховар», Марзия Саидова).- Дар маркази Вилояти Мухтори  Кӯҳистони Бадахшон /ВМКБ/ шаҳри Хоруғ 4 июл маросими тӯйи хонадоршавии 40 ҷуфт ҷавонони шаҳру ноҳияҳои вилоят баргузор гардид. Ин чорабинӣ дар доираи тавсеаи ҳамкориҳои дуҷонибаи Тоҷикистону Эрон бо ташаббуси Кумитаи байналмилалии имдоди имом Хумайнии Эрон ва мақомоти иҷроияи маҳаллии ҳокимияти давлатии ВМКБ ташкил карда шуд. 40 ҷуфт навхонадоронро бо ин рӯзи саид намояндагони Вазорати меҳнат ва ҳифзи иҷтимоии аҳолии ҷумҳурӣ, мақомоти иҷроияи ҳокимияти давлатии ВМКБ ва намояндагии Кумитаи байналмилалии имдоди имом Хумайнӣ сидқан табрик намуда, ба онҳо рӯзгори пурсаодатро таманно карданд. Назар ба  иттилои раиси намояндагии Кумитаи имдоди имом Хумайнӣ дар ВМКБ Ҳалим Ҷамшедов, чунин тӯйи ҷавонони оилаҳои ниёзманди вилоят бори нахуст дар шакли дастаҷамъона дар доираи Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» гузаронида шуд.    Ба навхонадорон ҷиҳози рӯзгор, аз қабили яхдону мошинаи дарздӯзӣ, қолин  ва дигар тӯҳфаҳо тақдим карда шуд. Дастаи ҳунармандони идораи фарҳанги ВМКБ бо созу таронаҳои дилнишин ва барномаи ҷолиби консертӣ навхонадоронро табрик намуданд. Ҳалим Ҷамшедов, афзуд  ки намояндагии Кумитаи имдоди имом Хумайнӣ ду сол инҷониб дар ВМКБ фаъолият дошта, алҳол ба 250 оилаҳои ниёзманди вилоят кӯмак мерасонад.