ТАШКИЛИ ОДИЛОНАИ МАЪРАКАИ ИМТИҲОНОТ

Суғд, 29 июл.(АМИТ  “Ховар”, Мирзалӣ Амонов, Самад Юсуфӣ).-Дар ин рӯзҳо диққати раёсат ва аҳли Донишгоҳи давлатии ҳуқуқ, бизнес ва сиёсати Тоҷикистон ба масъалаи бомуваффақият, шаффофу одилона ташкилу гузаронидани маъракаи имтиҳоноти қабул равона гардидааст. Дар иртибот ба ин аз ҳисоби мутахассисони масъулиятшиносу варзида дар донишгоҳ комиссияи босалоҳияти қабул фаъолияти хешро тибқи санадҳои меъёрию ҳуқуқӣ ташкил карда, вобаста ба 17 ихтисос ба шӯъбаҳои рӯзонаю ғоибона  ва ба гурӯҳҳои русию тоҷикӣ қабули ҳуҷҷати довталабонро  ба роҳ мондааст. Тибқи нақшаи тасдиқнамудаи Вазорати маорифи Ҷумҳурии Тоҷикистон Донишгоҳ дар соли таҳсили 2010 – 2011 қабули 920 нафар довталабонро тасмим гирифтааст. Маъракаи супурдани ҳуҷҷатҳо аз ҷониби довталабон бомуваффақият ҷараён дорад.