ТИМИ МУНТАХАБИ ИСПАНИЯ АВВАЛИН БОР ДАР ТАЪРИХ ЧЕМПИОНИ ҶАҲОН ДАР РИШТАИ ФУТБОЛ ГАРДИД

Душанбе 12 июл (АМИТ «Ховар», Пайрав Назаров )- Дар мусобиқаи финалии чемпионати ҷаҳон испаниҳо  тими мунтахаби Нидерландияро бо ҳисоби 1:0 мағлуб намуданд. Ҳамин тариқ чемпионҳои Аврупо аввалин маротиба Ҷоми ҷаҳонро дар риштаи футбол  соҳиб гаштанд. Вақти асосии вохӯрӣ дуранг анҷом ёфт. Дар дақиқаи  116-уми  вақти иловагӣ  нимҳимоятчӣ  Андрес  Инйест ба дарвозаи тими Голландия тӯбро дохил намуд. Дар ин вақт  голландиҳо баъди аз майдон берун намудани ҳимоятгар Ҷон Хейтинг 10 нафар бозӣ мекарданд. Мусобиқа хеле тезутунд гузашт : довари асосии вохӯрӣ  Ховард Уэбб ба бозингарони ҳар ду даста 13 корти зард  ва як корти сурх нишон  дод. Ҳар ду даста  имкон доштанд, ки  ҳисобро ҳанӯз  зимни бозӣ дар вақти асосӣ  кушоянд, вале аз лаҳзаҳои  қулай дуруст истифода карда  натавонистанд  Арйен Роббен нимҳимоятгари голландӣ барои дар дақиқаи 62-юми бозӣ  кушодани  ҳисоб имконияти беҳтарин дошт,  вале ӯ ҳам натавонист  дарвозабони Испания  Икера  Касилясро мағлуб намояд. Дар вақти иловагии ҷудошуда  Сеск Фабрегас нимҳимоятгар Андрес  Инйестро ба хати ҳуҷум баровард ва ӯ аз  масофаи наздик ба дарвозаи  тими Голландия тӯб зад. Бояд таъкид намуд, ки тими мунтахаби  Испания барои  аввалин бор аст, ки унвони чемпиони ҷахонро соҳиб мегардад . Дар мусобиқаҳои қаблӣ  дастаи мазкур ҳатто ба бозии нимфинал  набаромада буд. Он чи ки ба голландиҳо  дахл дорад,  ин аст, ки онҳо  бори  сеюм аст,  ки   дар қисмати ниҳоии  мусобиқоти  ҷаҳонӣ мағлуб мегарданд. Ёдовар мешавем, ки  дастаи мунтахаби  Нидерландия  солҳои 1974  ва  1978  низ то  бозии  ҳалкунандаи  мусобиқа  расида буд.