ЗАБОНИ ФОРСӢ МАҚОМИ РАСМӢ МЕГИРАД?

Душанбе, 13 июл.(АМИТ «Ховар», Марзия Саидова).-«Эрон талош ва иқдом дорад, ки забони форсӣ ҳамчун забони расмӣ дар сатҳи ҷаҳонӣ дар радифи забонҳои расмии дунё- англисӣ, русӣ, чиноӣ, арабӣ ва испанӣ аз сӯи Созмони Миллали Муттаҳид /СММ/ эътироф гардад». Ин матлабро 13 июл дар Душанбе зимни нишасти матбуотӣ ба ҳабарнигорон Роҳбари дастгоҳи Президенти  Эрон Исфандиёр Раҳими Машоӣ зикр намуд. Мавсуф гуфт,  забони форсӣ, ки яке аз забонҳои қадима ва дорои таърихи бой аст, имрӯз дар бархе аз кишварҳои минтақа ниёз ба ташаккул ва ҳимоят дорад. Роҳбари маъмурияти Президенти Эрон гуфт, ки дар масъалаи ҳифзи арзишҳои бузурги фарҳангии  форсизабонон Ҳукумати Эрон тадбирҳои судмандро меандешад. Яке аз онҳо ҷаҳонӣ шудани Ҷашни бостонии форсизабонон — Наврӯз аст, ки  аз сӯи СММ ҳамчун ҷашни байналмилалӣ эътироф гардид. Бояд зикр кард, ки забони форсӣ, ки забони мардумони ориёинажод маҳсуб мешавад,  дар қаламрави кишварҳои Тоҷикистон, Афғонистон ва Эрон бо лаҳҷаҳои хоси мардумони он истифода  мешавад. Дар маҷмӯъ бо забони ноби форсӣ беш аз 100 миллион аҳолии ҷаҳон гуфтугӯ менамоянд.