ЗАРАРИ БОЗДОШТИ ВАГОНҲО БА СОҲИБКОРОНИ ТОҶИК

Душанбе,  5 июл. (АМИТ «Ховар», Кристина  Эрлих). —  Боздошти  вагонҳои Тоҷикистон  дар  қаламрави  Ӯзбекистон  сабаби   коҳиш  ёфтани  интиқоли  мол  ба  воситаи  шохаи  роҳи  оҳани  Амӯзанг – Хатлон  гардид. Бо  ҳамин  сабаб  соҳибкорону тоҷирони тоҷик  аз  интиқоли  мол ба  воситаи  шохаи  роҳи  оҳани  мазкур   даст  кашида,  вагонҳои  худро  ба  самти  Душанбе  мефиристанд. Айни  ҳол  ба  вилояти  Хатлон  дар  давоми  шабонарӯз  аз  18 то  20 вагони  боркаш  дохил  мегардад. Ҳоло  дар  қаламрави  Ӯзбекистон  бештар  аз  290  вагон боздошта шудааст.  Миқдори вагонҳои  боздошташуда  аввали  моҳи  июн тақрибан  ба  900  адад   мерасид. Агар  вазъият  ҳамин  тавр  давом  кунад,  барои  ба  Хатлон  фиристодани  290 вагони боқимонда қариб   ним  моҳ  сарф  мешавад. Айни  ҳол  ба  самти  Душанбе  ҳар  шабонарӯз то 250  вагон  мол  фиристода  мешавад,  хабар  медиҳад  мухбири  АМИТ «Ховар».