ҲАМКОРИҲОИ ФАРҲАНГИИ ТОҶИКИСТОНУ ЭРОН

Душанбе, 2 август. (АМИТ «Ховар», Лутфия Эшонқулова).-Дар Вазорати фарҳанги Ҷумҳурии Тоҷикистон мулоқоти муовини аввали вазири фарҳанг Миралӣ Достиев бо ҳайати 40 нафараи устодони  донишгоҳҳои Ҷумҳурии Исломии Эрон баргузор гардид. Зимни вохӯрӣ Миралӣ Достиев ҳайати меҳмононро хайрамақдам гуфта, онҳоро бо вазъи соҳаи фарҳанги ҶТ ошно намуд. Ҳамчунин, ӯ зикр кард, ки дар ин самт ҳамкориҳоро боз ҳам қавитар намудан лозим аст. Дар навбати худ муовини Раис оид ба бахши омӯзишии Донишгоҳи Теҳрон Саидмаҳдии Қайсарӣ изҳор намуд: «Ҳадафи ин вохӯрӣ маҳз дар он аст, ки ҳамкориро дар самти фарҳанг дар оянда низ ба роҳ бояд монд, зеро дар Донишгоҳи Теҳрон дар ин самт таваҷҷӯҳ зиёдтар аст». Ҳамчунин, ҳайати меҳмонон аз нақшаҳои ояндаи ҳамкорӣ дар соҳаи фарҳанг сухан ронда гуфтанд, ки метавон гурӯҳҳои ҳунармандони Донишгоҳҳои Эронро ба Тоҷикистон ва ҳамчунин аз Тоҷикистонро ба Эрон барои мубодилаи ҳунару истеъдод сафарбар кард. Бояд ёдрас шуд, ки сафари устодони донишгоҳҳои Эрон ба Тоҷикистон дар доираи тақвияти ҳамкориҳои судманди Тоҷикистону Эрон ва муассисаи фарҳангии ЭКО сурат гирифтааст. Ҳамзамон, ҳайати мазкур аз Китобхонаи миллии Тоҷикистон ба номи Абулқосим Фирдавсӣ, Осорхонаи миллии ба номи Камолиддин Беҳзод ва муассисаҳои илмию фарҳангии шаҳри Қурғонтеппа дидан намуданд.