БЕЭҲТИЁТИИ РОНАНДАГОН САБАБИ ФОҶЕА

Душанбе, 9 август. (АМИТ «Ховар», Лутфия Эшонқулова).- Аз 2 то 8-уми августи соли ҷорӣ дар роҳҳои автомобилгарди ҷумҳуриамон 25 садамаи роҳу нақлиёт ба қайд гирифта шудааст, ки бар асари онҳо 3 нафар ба ҳалокат расида 28 нафари дигар ҷарохатҳои гуногуни ҷисмонӣ бардоштанд. Аз ҷумла, дар ноҳияи Рӯшон рӯзи 8-уми август соати 18.50 ронандаи автомашинаи тамғаи «Мерседес-Бенс» , ки аз самти Душанбе ба Хоруғ ҳаракат мекард, пиёдагарди ноболиғ Малитбеков Акмали 10 соларо зер мекунад. Дар натиҷа пиёдагард дар беморхона ба ҳалокат мерасад. Худи ҳамон рӯз ҳамчунин дар ноҳияи Конибодом соати 22.10 ронандаи автомашинаи тамғаи «ВАЗ-2107» Сафаров Салоҳиддин ҳангоми ҳаракат дар қитъаи 36 роҳи автомобилгарди Хӯҷанд-Конибодом пиёдагарди ноболиғ-Одинаев Шаҳроми 7 соларо зада аз пой меафтонад, ки дар натиҷа ин наврас дар беморхона ба ҳалокат мерасад.