БЕМОРХОНАИ АШТ СОҲИБИ «ГАСТРОФИБРОСКОП» МЕШАВАД

Душанбе, 6 август. (АМИТ «Ховар», Бекназари Абӯбакр). — Беморхонаи марказии ноҳияи Ашт соҳиби таҷҳизоти нави тиббии «Гастрофиброскоп» хоҳад шуд. Дар ин бора раиси вилояти Суғд Қоҳир Расулзода қарори махсус имзо намуд. Мутобиқи қарори мазкур сарраёсати молияи вилоят вазифадор шудааст, ки аз ҳисоби буҷети вилоятӣ барои харидорни ин таҷҳизот  31 ҳазору 500 сомонӣ ҷудо намояд. Дар баробари ин, раёсати тандурустии вилоят муваззаф гаштааст, ки истифодаи мақсаднок ва самарабахши маблағи ҷудошударо назорат намуда, оид ба хароҷоти анҷомдодашуда ҳисобот пешниҳод кунад. Ёдрас мешавем, ки ин дастгоҳи муосири тиббӣ барои ташхиси бемориҳои дарунӣ, аз ҷумла узвҳои ҳозима истифода мешавад.