БОҒИ ИСТИРОҲАТИИ ФАРХОР ТАЪМИРТАЛАБ АСТ

Фархор, 2 август. (АМИТ «Ховар», Сулаймон  Холов).- Боғи фарҳангу истироҳатии ноҳияи Фархор макони баргузории чорабиниҳои гуногун ва ҷои дӯстдоштаи сайру фароғати сокинон гаштааст. Ин мавзеи фарҳангӣ дар масоҳати беш аз  5 гектар  ҷойгир буда, бояд  дорои шароити муносиб ва муосири истироҳату фароғат бошад, аммо  арғунчакҳои он солҳост, ки рӯи таъмирро надида корношоям гаштаанду барои кӯдакон хеле хатарнок. Бачаҳо бошанд  ба ин нигоҳ накарда, ба ин ҷо меоянд ва бидуни назорати  масъулин аз хизмати  онҳо истифода мебаранд.  Бино ба гуфти масъулини раёсати фарҳанги ноҳия  тайи солҳои охир баҳри ободу зебо гардонидани боғ аз масофаи 120 метр хати об кашидаву  дарахтони зиёд шинонидаанд, ки айни замон нашъунамои онҳо хеле хуб аст. Ҳарчанд барои  таъмир ва тармими ин муассисаи фарҳангӣ чандин сол боз аз буҷаи маҳал маблағгузорӣ намешавад, бо ҷалби соҳибкорони маҳаллӣ дар ин ҷо биноҳои гуногуни фароғатӣ бунёд мегарданд.  Боварӣ дорем, ки дар доираи 900 рӯзи ободонию бунёдкорӣ ба ифтихори 20 –умин солгарди Истиқлолияти давлатии Ҷумҳурии  Тоҷикистон боғи фарҳангу истироҳатии  ноҳияи Фархор таъмиру тармим гашта, воқеан ҳам макони дӯстдоштаю тамошобоби  шаҳрвандон мегардад.