ИДИ АСАЛ ДАР ВИЛОЯТИ ХАТЛОН

Кӯлоб, 2 август. (АМИТ «Ховар», Сулаймон  Холов).- Чанд сол боз бо мақсади рушди соҳаи замбӯри асалпарварӣ дар Ҷумҳурии Тоҷикистон иди асал гузаронида мешавад, ки зимни баргузории ин чорабинӣ  замбӯриасалпарварон имкон пайдо менамоянд маҳсулоти худро дар намоишгоҳҳои ноҳиявӣ, вилоятӣ ва ҷумҳуриявӣ ба савдо бароварда, инчунин  бо ҳамдигар табодули таҷриба намоянд. Баҳри иштирок дар  иди асал дар боғи фарҳангу истироҳати шаҳри Кӯлоб беҳтарин замбӯриасалпарварони шаҳру ноҳия бо ҳам ҷамъ омада, навъҳои гуногуни асали  истеҳсолнамудаи хешро ба намоиш ва фурӯш  бароварданд. Бояд қайд намуд, ки давоми чор соли охир шумораи замбӯриасалпарварон дар ноҳия афзоиш ёфта, оилаҳои замбӯри асалро се баробар зиёд гардонидаанд . Дар иди асал муовини сарвазири мамлакат ширкат варзида, аз дастовардҳои замбӯриасалпарварони шаҳру ноҳияи Кӯлоб изҳори қаноатмандӣ намуд ва ба масъулин ҷиҳати кушодани мағозаҳои махсуси фурӯши маҳсулот ва таҷҳизоту лавозимоти соҳавӣ дастур дод. Чунин  як чорабинии  дигари замбӯриасалпарварон дар ноҳияи Фархор доир гардид, ки дар он  асалпарварони  10 ҷамоати деҳоти ноҳия дар баробари навъҳои гуногунтамъи   асал, инчунин дигар маҳсулоти кишоварзӣ аз қабили тарбузу харбуза, каду, бодирингу помидор ва хӯришҳои аз ин сабзавот тайёршударо  ба намоиш ва фурӯш  гузоштанд.  Бояд гуфт, ки ҳокимияти маҳаллӣ барои беҳтарин замбӯриасалпарвар ва маҳсулоти кишоварзии беҳтарин қаблан озмун эълон намуда, ҳайати ҳакамон баъди  санҷидани  маҳсулоти пешниҳодгардида ғолибонро  муайян намуданд.  Зимни ин чорабинӣ  замбӯриасалпарварони ноҳия дар баробари муваффақиятҳо дар рушди  соҳа   аз мушкилоти худ низ  ҳарф заданд. Иди асал дар ноҳияи Фархор ба тантанаи ҳақиқӣ мубаддал гардид.   Ба беҳтаринҳо раиси ноҳия ифтихорнома ва тӯҳфаҳои хотиравӣ супорид. Барои иштирок дар иди асали вилоят ба онҳо роҳхат дод. Кормандони шӯъбаи фарҳанги ноҳия дар назди ҳозирин бо суруду рақсҳои дилнишин баромад намуда ба иди асал шукӯҳи дигар бахшиданд.