«ИЛТИҶО ДОРАМ, КИ МӮЯТРО МАБУР»

Душанбе, 23 август. (АМИТ «Ховар», Ҳотам Рабиев).- Бахшида ба 20- солагии  Истиқлолияти давлатии  Ҷумҳурии Тоҷикистон  дар тамоми минтақаҳои мамлакат  даври дуюми  Фестивали ҷумҳуриявии «Чакомаи гесӯ» бо муваффақият идома дорад. Мақсади асосии баргузории фестивали ҷумҳуриявии «Чакомаи гесӯ» намоиш, ороиш ва  парвариши мӯй,  ҳунари волои  машшотаҳо ва ба ин  васила дар   доираи  расму оинҳои  миллӣ тарғибу  ташвиқи маросимҳои  анъанавии саршӯёну  арӯсбаророн,  мӯйбофону  зулфандозӣ,  ҷамолакбандию   кокулбофӣ буда,  дар он кулли  сокинони шаҳру  навоҳии кишвар  иштирок мекунанд. Яке аз ҳадафҳои  муҳимтарини Фестивал  дар сатҳи баланд  нигоҳ доштани    сарулибоси миллӣ,  сифати  тоза  бахшидан ба истеҳсоли  навъҳои  гуногуни  матоъҳои миллӣ, аз  қабили атласу  шоҳӣ,  чакану алоча,   сатину чит  ва ғайра мебошад. Ба Фестивали мазкур  аҳли фарҳанги  ноҳияҳои тобеи  марказ тайёрии  ҳамаҷониба  дидаанд. Чорабинии мазкур аллакай дар  ноҳияҳои Ҳисор, Шаҳринав  ва Варзоб баргузор гардид.