КУШТОРИ ДУХТУРОНИ ХОРИҶӢ ДАР ШИМОЛИ АФҒОНИСТОН

        Душанбе, 9 август. (АМИТ «Ховар»).- Мақомоти Афғонистон сабабу ҳолатҳои куштори 10 нафар корманди Созмони байнамиллалии кӯмаки башардӯстонаро тафтиш менамоянд.          Тибқи хабари сарчашма 6 нафар амрикоӣ, як бритонӣ, як шаҳрванди Олмон ва ду нафар афғон ҳалок шудаанд.         Дар байни қурбоншудагон се нафар зан, ҳамчунин як нафар духтури амрикоӣ, ки қариб 30 сол собиқаи корӣ дар Афғонистон дорад, ҳастанд. Ҳамаи онҳо дар вилояти Бадахшон бар асари як ҳамлаи толибон кушта шудаанд. Толибон онҳоро ба ҷосусӣ ба манфиати ИМА ва ташвиқу тарғиби динҳои дигар гунаҳкор намуданд.         Бояд қайд кард, ки духтурон чун намояндаи Созмони байналхалқии кӯмаки башардӯстона фаъолият мекарданд. Созмони мазкур созмони ғайриҳукуматии насронӣ ба шумор рафта, дар Афғонистон аз миёнаҳои солҳои 60-ум инҷониб фаъолият мекунад.