«ЛАКУ ПАК» ИН БОР НИЗ МУВАФФАҚ МЕШАВАД?

Душанбе, 25 августа. (АМИТ «Ховар», Бекназари Абӯбакр). – Бо дастгирии раиси вилояти Суғд Қоҳир Расулзода ҳафтаномаи «Лаку Пак» аз нав эҳё гардида, баъди танаффуси тӯлонӣ шумораи навбатии он ба табъ расид. Муассис ва сардабири ин нашрия, нависанда Додохони Эгамзод иттилоъ дод, ки бори сеюм аст, ки «Лаку Пак» аз сари нав мунташир мешавад. Сабаби нашр нагардидани нашрия асосан норасоии маблағ буд. Ёдовар мешавем, ки нахустшумораи ин ҳафтанома 29 июли соли 1998 дар нашриёти «Шарқи озод»-и шаҳри Душанбе чоп шуда, бо хоҳишу дархости хонандагони сершумор чор сол пеш нашрия бори дуввум нашр гардид, вале бо сабабҳои молиявӣ чопи он дер давом накард. Ҳайати эҷодии ҳафтанома тасмим гирифтаанд, ки нашрияи «Лаку Пак» мунтазам — ҳар ҳафта бо теъдоди 3 ҳазор нусха, иборат аз маводи хонданӣ ба табъ расад.