МАКТАБИ ТОБИСТОНАИ ОЛИМОНИ ҶАВОНИ ШАРҚШИНОСИ ИДМ

Душанбе, 13 август. (АМИТ «Ховар», Дилшодаи Ҷонмард).- Аз 16  то 26 августи соли равон дар шаҳри Душанбе Мактаби тобистонаи шарқшиносони ҷавони давлатҳои  ИДМ таҳти унвони  «Ситезаҷӯиҳои глобалӣ ва посухҳои пешгиркунанда» машварат баргузор менамояд.  Барномаи илмии мактаби тобистона гузоришҳо ва курсҳои махсусро доир ба масъалаҳои муҳимтарини таърих, дин, фарҳанг ва санъат, дастнависҳо ва анъанаҳои китобати онҳоро дар бораи Осиёи Марказӣ дар бар мегирад. Барномаи мактаби мазкур барои 7-рӯзи корӣ пешбинӣ шудааст ва 7 қисмати асосӣ — сиёсат, иқтисодиёт, тадриси илмҳои шарқшиносӣ, санъат ва осорхонаҳо, дин, дастхат ва анъанаҳои китобати онҳо ва адабиётро дар бар мегирад. Масъулони асосии баргузор намудани ин чорабинӣ Инсититути шарқшиносии  Академияи илмҳои Федератсияи Руссия ва Пажӯҳишгоҳи  шарқшиносӣ ва мероси хаттии Академияи илмҳои Ҷумҳурии Тоҷикистон бо дастгирии молиявии фонди байнидавлатии ҳамкории гуманитарии давлатҳои аъзои ИДМ мебошанд.  Пешниҳоди баргузор намудани ин чорабиниро дар ҷараёни симпозиуми байналмиллалӣ бахшида ба соли бузургдошти Имом Абуҳанифа моҳи октябри соли 2009  директори Инсититути шарқшиносии  Академияи илмҳои Федератсияи Руссия В.В. Наумкин ба миён  гузошта буд. Баргузор шудани ин чорабинӣ эътирофи илми шарқшиносии тоҷик аст. Аҳамияти чорабинӣ вусъат бахшидани ҳамкории насли ҷавони олимону муҳаққиқон ва аз худ намудани таҷрибаи наслҳои калонсоли илмӣ мебошад. Мизбонони чорабинӣ Пажӯҳишгоҳи шарқшиносӣ ва мероси хаттии Академияи илмҳои Ҷумҳурии Тоҷикистон барои дар сатҳи баланди илмӣ-ташкилӣ доир намудани ин мактаби илмӣ тамоми чораҳои заруриро анҷом медиҳанд.     .