МЕТАДОН-ЗИДДИ НАШЪАМАНДӢ

Бадахшон, 16 август. (АМИТ «Ховар», Л. Додо). – Тавре духтури муассисаи тиббии зидди нашъамандии ВМКБ Мӯсо Мардонов иттилоъ дод, ҳоло дар вилоят 789 нафар беморони гирифтори нашъамандӣ ба қайд гирифта шудаанд, ки 5 нафарашонро занон ташкил медиҳанд. Теъдоди нашъамандон нисбат ба соли 2009 23 нафар зиёд гашта, дар 7 моҳ 18 нафар нашъаманд фавтидаанд. Ба гуфти Мӯсо Мардонов шумораи нашъамандон ва фавти онҳо сар аз моҳи сентябри соли ҷорӣ бояд камтар гардад, зеро барои табобати нашъамандон доруи нав-маҳлули Метадон истифода мешавад. Ин маҳлул дар саросари муассисаҳои тиббии наркологии ҷаҳон санҷида шуда, натиҷаи дилхоҳ додааст. Тарзи табобати он чунин аст: ҳар пагоҳӣ нашъамандон ба муассисаи тиббӣ омада, маҳлули Метадонро истеъмол мекунанд. Баъди истеъмоли ин дору нашъамандро дигар хумори нашъа намегирад ва ҳамин тавр бо мурури замон аз истеъмоли героин даст мекашад.