МУҲОКИМАИ МАСЪАЛАҲОИ ҚОНУНШИКАНӢ ДАР СОҲАИ ИСТИФОДАИ ЗАМИН

Қӯрғонтеппа, 16 август. (АМИТ «Ховар», Мурод Сотиев).- 13 август дар шаҳри Қӯрғонтеппа маҷлиси навбатии Шӯрои ҳамоҳангсозӣ мақомоти муҳифизи қонуни вилояти Хатлон баргузор гардид. Дар маҷлис Прокурори генералии ҷумҳурӣ Шерхон Салимзода ва раиси вилоят Ғайбулло Афзал иштирок доштанд. Ба маҷлис инчунин прокурорҳо, роҳбарон ва муовинони сардорони шӯъбаҳои корҳои дохилии шаҳру ноҳияҳои вилоят ва баъзе хоҷагиҳои деҳқонӣ даъват шуда буданд. Мухбири АМИТ «Ховар» хабар медиҳад, ки иштирокчиёни маҷлис ҷараёни иҷрои Кодекси замин ва қонунҳои дигари ҷумҳуриро дар соҳаи истифодаи замин ва ислоҳоти он мавриди баррасӣ қарор доданд. Прокурори вилояти Хатлон Абдураҳим Раҳимов зикр намуд, ки вақтҳои охир ҳодисаҳои қонуншиканӣ дар соҳаи истифодаи замин бештар ба назар мерасанд. Чунин ҳодисаҳо ва ҷиноятҳои марбут ба истифодаи замин дар ноҳияҳои Бохтар, Вахш, Қумсангир, Шаҳритус ва Восеъ аз ҳама зиёд ба қайд гирифта шудаанд. Дар баъзе ноҳияҳои вилоят замин мавриди хариду фурӯши ғайриқонунӣ қарор дода мешавад. Роҳбарони гуногунпояи кумитаҳои заминсозӣ, ҷамоатҳо, хоҷагиҳои деҳқонӣ ва роҳбарони ноҳияҳо аз ин истифода бурда, ба содир намудани ҷиноят мусоидат менамоянд. Прокурори вилоят афзуд, ки барои содир кардани ҷиноят дар соҳаи истифодаи замин нисбати шахсони мансабдор 60 парвандаи ҷиноӣ кушода шуд. Инчунин дар ҳудуди вилоят ҳодисаҳои сершумори ғайриқонунӣ ишғол намудани қитъаҳои замин ба назар мерасанд. Дар натиҷаи дахолат ва эътирози мақомоти прокуратура 132 гектар замин  ба ҳолати аввала баргардонида шуд. А. Раҳимов дар хотима зикр кард, ки мақомотаи прокуратураи вилояти Хатлон барои пешгирии чунин ҷиноятҳо тамоми тадбирҳои заруриро истифода мебаранд. Қайд карда шуд, ки ҳалли ин проблема ба фаъолияти муштараки ҳамаи мақомоти давлатӣ низ вобаста мебошад.