СӮҲБАТИ САФИРИ НАВИ ЧИН БО ХАБАРНИГОРОН

Душанбе, 13 август. (АМИТ «Ховар», Фирдавс Таваров).- Президенти Ҷумҳурии Тоҷикистон Эмомалӣ Раҳмон 13 августи соли 2010 эътиборномаи Сафири нави фавқулодда ва мухтори Ҷумҳурии Мардумии Чин дар Тоҷикистон Фан Сянжунро қабул кард. Сафири нави Чин баъди анҷоми мулоқоташ бо Президент зимни сӯҳбати мухтасар ба саволҳои хабарнигорон ҷавоб дод. Вай зикр намуд, ки мулоқоташ бо сардори давлати Тоҷикистон дар вазъияти дустонаю самимона гузашт ва мароқовару пурмӯҳтаво буд. Қайд карда шуд, ки муносибатҳои Чин ва Тоҷикистон заминаи мустаҳкам доранд. Ба ин аз бисёр ҷиҳат муносибатҳои дустонаю самимонаи сарони ҳар ду давлати ҳамсоя Эмомалӣ Раҳмон ва Ху Сзинтао мусоидат менамояд. Муносибатҳои самимонаи сарони ҳар ду мамлакат кафолати сиёсии рушди муттасили ҳамкории ҳар ду мамлакат мебошад, гуфт сафир. Қайд карда шуд, ки Тоҷикистону Чин дар соҳаҳои гуногуни иқтисоду сиёсат ва тиҷорат, инчунин мубориза ба муқобили терроризм, ифротгароӣ ва хариду фурӯши ғайриқонунии маводи нашъадор чи дар асосҳои дуҷониба ва чи дар доираи созмонҳои байналхалқию минтақавӣ самарабахш ҳамкорӣ мекунанд. Сафир афзуд, ки муносибатҳои доманадори Чин ва Тоҷикистон дар оянда боз ҳам бештар равнақу ривоҷ хоҳанд ёфт. Фан Сянжун дар хотима изҳор намуд, ки барои боз ҳам бештар ривоҷ ёфтани муносибатҳои Тоҷикистону Чин тамоми таҷриба ва дониши худро истифода мебарад.