ШАРБАТҲОИ ШИРИНИ ШАҲРИНАВ

Шаҳринав, 18 август. ( АМИТ « Ховар», Ҳотам Рабиев).- Дар корхонаи консервабарории  ҶДММ  «Шараф»-и ноҳияи Шаҳринав  сехи собунбарорӣ  ба кор оғоз кард. Сехи мазкур дар як  шабонарӯз то  ҳазор дона собун  истеҳсол  менамояд. Маъмурияти корхона мақсад дорад, ки  рӯзҳои наздик  сехи истеҳсоли шарбати  табииро  ташкил намоянд. Зеро шарбати аз меваҳои худӣ истеҳсолшуда  ба  саломатии мардум фоидаовар буда,  талабот ба он  хеле  зиёд  аст. Корхонаи консервабарории  мазкур, ки дар  шаҳраки Чиптӯра  ҷойгир аст, дар  замони шӯравӣ  хеле овозадор  буд. Ин корхона  як муддат аз  кор монда,  вайрону валангор  гардид. Соли 2000-ум  соҳибкори асил  Ислом  Назаров ин  корхонаро харида,  таъмиру тармим намуд ва  дере нагузашта он  ба фаъолияти  пурсамар оғоз намуд. Ҳоло дар  ин ҷо  52 нафар коргар  ба таври  доимӣ ва  148  нафар дар айни  мавсим  кор мекунанд. Бояд гуфт, ки корхона  бо хоҷагиҳои   зиёд ҳамкорӣ дошта, коргарон дар ин ҷо  аз  меваҳои зардолу, олуча, себ,  шафтолу , ангур, хурмо  афшураҳо  тайёр  менамоянд. Ҳамчунин, афшураҳои  аз помидор тайёркардашуда  харидорони зиёд  доранд.