ТАҶЛИЛИ РӮЗИ КИТОБ ДАР СУҒД

Душанбе, 4 август. (АМИТ «Ховар», Бекназари Абӯбакр). — Дар соли маориф ва фарҳанги техникӣ санаи 4 сентябри соли равон дар қаламрави вилояти Суғд Рӯзи китоб таҷлил мегардад. Дар ин бора қарори раиси вилояти Суғд Қоҳир Расулзода «Дар бораи таҷлили Рӯзи китоб» ба тасвиб расид. Ҳадафи аслии ин қарор тарғиби китоб, донишу фарҳанги миллӣ ва ташаккули ифтихору худшиносии мардум арзёбӣ мешавад. Мутобиқи қарори мазкур мақомоти иҷроияи ҳокимияти давлатии шаҳру ноҳияҳои вилоят барои дар сатҳи баланд доир намудани чорабиниҳои бахшида ба Рӯзи китоб, доир намудани фурӯши китобҳо, асарҳои адибони муосир ва намоиши дастхату китобҳои нодир вазифадор шудаанд.