ЯРМАРКАИ КАСБӢ-ОМӮЗИШӢ

Душанбе, 30 август. (АМИТ «Ховар», Дилшодаи Ҷонмард).- Имрӯз дар доираи  «Ҳафтаи таълими калонсолони Тоҷикистон» дар шаҳри Душанбе ярмаркаи омӯзишӣ-касбӣ баргузор гардид. Ин ярмарка ба 19-солагии Истиқлолияти давлатии Ҷумҳурии Тоҷикистон бахшида шуда, дар он маҳсулоти муассисаҳои касбомӯзии Агентии давлатии ҳифзи иҷтимоӣ, шуғли аҳолӣ ва муҳоҷират, ташкилотҳои ғайридавлатӣ ва корхонаю муассисаҳои кордиҳанда ба маъраз гузошта шуд. Ҳадафи асосии баргузории ярмарка ҷалб намудани шаҳрвандони бекор, муҳоҷирони меҳнатӣ барои азхудкунии касбу ихтисосҳои гуногуни замонавӣ, бозомӯзии такмили ихтисос ва баланд бардоштани малакаҳои касбии аҳолӣ мебошад. Дар ярмарка намоиши маҳсули дастони касбомӯзони муассисаҳои таълимӣ, шароити касбомӯзӣ ва номгӯи касбу ихтисосҳои омӯхташавандаи муассисаҳои касбомӯзии Агентии давлатии ҳифзи иҷтимоӣ, шуғли аҳолӣ ва муҳоҷират пешниҳод гардид. Хоҳишмандон дар ярмарка фаъолона иштирок намуда, бо ҷойи кор ва касби дилхоҳашон  таъмин гардидаанд.