БУРДУ БОХТИ 5 БОЗИИ ШАТРАНҶБОЗОНИ ТОҶИК

Душанбе, 28 сентябр. (АМИТ «Ховар», Бекназари Абӯбакр). — Аз 19 сентябр дар шаҳри Ханти-Мансийски Федератсияи Русия Олимпиадаи 39-уми ҷаҳонии шоҳмот ҷараён дорад, ки дар он дастаҳои мардонаю занонаи шоҳмоти Ҷумҳурии Тоҷикистон иштирок доранд. Ин дастаҳо то имрӯз панҷ бозигӣ анҷом додаанд. Дастаи мардонаи Тоҷикистон, ки дар 5 бозӣ 1 ғалаба ба даст оварда, 2 бозиро мусовӣ кард ва дар 2 бозӣ мағлуб гашт, байни 149 даста дар ҷои 87-ум қарор дорад. Шатранҷбозони тоҷик Фаррух Амонатов, Анвар Назаров, Ҷамшед Исоев, Соҳиб Ҷӯраев ва Рашид Ҳусейнов бар дастаи Тринидад ва Тобаго бо ҳисоби 4:0 ғалаба карда, бозиро бо дастаҳои Тайланд ва Пуэрто-Рико бо ҳисоби 2:2 анҷом доданд ва аз дастаҳои Белгия ва Уругвай бо ҳисоби якхелаи 1,5:2,5 шикаст хӯрданд. Дастаи занонаи Тоҷикистон бошад, баъди 5 бозӣ — 2 ғалаба, 1 мусовӣ ва 2 бохт байни 115 даста дар ҷои 53-юм қарор дорад. Бонувони шатранҷбози тоҷик Марворид Насриддинзода, Надежда ва Лидия Антоноваҳо, Асила Мӯҳтоҷзода ва Мутрибаи Илҳом бар дастаҳои Яман бо ҳисоби 3:1 ва Пуэрто-Рико бо ҳисоби 3,5:0,5 пирӯз шуда, бозиро бо IBCA бо ҳисоби 2:2 анҷом доданд ва аз дастаҳои Озарбойҷон бо ҳисоби 0,5:3,5 ва Барбадос бо ҳисоби 1,0:2,5 мағлуб гаштанд. Ёдовар мешавем, ки Олимпиадаи ҷаҳонӣ дар 11 давр, то рӯзи 4-уми октябр идома хоҳад кард.