ДАР ТОҶИКИСТОН БАРӮЙХАТГИРИИ АҲОЛӢ ОҒОЗ МЕЁБАД

    Душанбе, 20 сентябр.(АМИТ «Ховар», Марзия Саидова).-Пагоҳ 21 сентябри соли 2010 дар Ҷумҳурии Тоҷикистон маъракаи муҳими сиёсӣ- барӯйхатгирии аҳолӣ ва фонди манзил оғоз меёбад.  Барӯйхатгирии аҳолӣ ва фонди манзил қисми таркибии ҷудонашавандаи низоми омори миллии мамлакатро ташкил медиҳад  ва манбаи асосии маълумот  дар бораи аҳолӣ, тақсимоти он дар ҳудуди  Тоҷикистон, ҳайати миллӣ ва забон, сатҳи маърифатнокӣ, шароити манзилӣ ва вазъи фонди манзил мебошад.       Яке аз самтҳои асосии барӯйхатгирии аҳолӣ мусоидат ба рушди иқтисодиёти миллӣ аст. Зеро маълумоти барӯйхатгирӣ ҳангоми банақшагирии бозори меҳнат, тартиб додани  буҷет, сиёсати нақлиёт, ҳисоби нерӯи барқ ва рушди бемайлони дигар соҳаҳои иқтисоди кишвар аҳамияти калон дорад.      Барӯйхатгирии аҳолӣ ва фонди манзил дар Ҷумҳурии Тоҷикистон дар давоми даҳ сол як маротиба гузаронида мешавад.