ФЕСТИВАЛИ «ДӮСТИИ ХАЛҚҲО» ДАР ТОҶИКИСТОН

Душанбе, 15 сентябр. (АМИТ «Ховар», Дилшодаи Ҷонмард).-Дирӯз дар Вазорати фарҳанги Ҷумҳурии Тоҷикистон вобаста ба баргузор шудани Фестивали байналмилалии мусиқии «Осмони Иттиҳод» бо ширкати созмондиҳандагони фестивали мазкур нишасти матбуотӣ доир шуд. Дар нишасти матбуотӣ созмондиҳандагони фестивал қайд карданд, ки Фестивали номбурда минбаъд ҳамасола дар ҳама давлатҳои  Иттиҳоди давлатҳои мустақил гузаронида мешавад ва дар оянда яке аз фестивалҳои машҳур дар ИДМ хоҳад шуд. Тавре продюсери кулли Фестивали «Осмони Иттиҳод» Юлия Морозова ба журналистон иттилоъ дод,  ҳамаи хароҷотҳои фестивалро Фонди байнидавлатии ҳамкориҳои башардӯстонаи давлатҳои узви ИДМ  (МФГС) ба уҳдаи худ гирифтааст. Ба қавли Юлия Морозова, дар чаҳорчӯби ин фестивал ду барномаи консертӣ – дар Маҷмааи консертии «Кохи Борбад» ва дар майдони «800-солагии Масква» баргузор карда мешавад. «Қарори баргузор намудани ин гуна фестивал ҳарчанд он қадар барвакт набуд, вале мо шодем, ки аввалин шуда Тоҷикистон барои доир кардани он интихоб шудааст», — гуфт продюсери кулли фестивал. Бояд гуфт, ҳадаф аз доир намудани чунин чорабиниҳо – сарҷамъ намудани овозхонҳо ва ошно намудан бо санъат ва фарҳанги кишварҳои ИДМ мебошад. Шиори асосии фестивал ҳам «Дӯстии халқҳои ИДМ» аст. Ёдовар мешавем, ки аксарияти овозхонони фестивал иштирокчиёни «Евровидения», «Интервидения.Панҷ ситора» ва дигар озмунҳои байналмилалӣ мебошанд.