МАКТАБ БАРОИ ЗАРАРДИДАГОН

Душанбе, 24 сентябр.(АМИТ «Ховар», Лаззат Диловарзод).- Дар мавзеи Хамиртеппаи шаҳри Панҷакент сохтмони мактаб барои зарардидагони офати табиӣ оғоз шуд ва он то рӯзи иди Парчами давлатӣ сохта ба истифода дода мешавад,- хабар дод сардори ҶСК «Асл» Саъдулло Иноятов ба мухбири АМИТ «Ховар».    Ба иттилои ҳамин манбаъ, дар давоми ду соли охир сохтмончиёни ин ташкилоти сохтмонӣ бинои бонки «Эсхата», мактаби деҳаи Раводдин, 10 синфхонаи иловагӣ барои мактаби рақами 7-и деҳаи Кулолӣ, дидбонгоҳи сарҳадии қисми низоми «Н»-ро бунёд ва ба истифода доданд.    Соли ҷорӣ ин ташкилоти сохтмонӣ барои зарардидагони деҳаи Шӯрча ва аз офати табиӣ зарардидагони ноҳияи Хуросон 4 хона сохта, бо тамоми таҷҳизоти зарурӣ ба соҳибонашон супориданд.    Бо заҳмати сохтмончиёни ҶСК «Асл» пули мошингузари деҳаҳои Ғезан – Моғиён ва 4 пули валангоршудаи деҳаи Артуч барқарор, хонаи маданияти деҳаи Ғусор ва   озмоишгоҳи бактериологии  шаҳри Панҷакент  аз таъмир бароварда шуданд.