«ТАВСЕАИ ЭНЕРЖИИ ПОК» ҲИСОБКУНАКҲО ВОРИД МЕСОЗАД

Душанбе, 21 сентябр.(АМИТ «Ховар», Марзия Саидова).-Интизор меравад, ки рӯзҳои наздик ширкати эронии «Тавсеаи энержии пок» бо Вазорати энергетика ва саноати Ҷумҳурии Тоҷикистон қарордоди ҳамкориро дар заминаи фурӯш ва ба корандозии 200 ҳазор  дастгоҳи назорати барқии электронӣ ба имзо мерасонад.Назар ба иттилои масъули бахши иқтисод ва тиҷорати Сафорати Ҷумҳурии Исломии Эрон дар Ҷумҳурии Тоҷикистон Аббос Баёнӣ  ҳисобкунакҳои ҷадиди электронии барқӣ, ки сохти Эрон мебошад,  дар минтақаи Хатлон насб карда мешаванд. Мавсуф афзуд, ки роҳбарияти  ширкати «Тавсеаи энержии пок» дар доираи баргузории нахустин намоишгоҳи технологияи энергетикии Ҷумҳурии Исломии Эрон дар Душанбе қарор доранд. Ширкати мазкур ҳамзамон, саъй дорад, ки ҷиҳати ба роҳандозии системаи биллингӣ (технологияи ҷадид барои судури чиптаҳои истифодаи нерӯи барқ) дар Тоҷикистон як идда корҳоро ба анҷом расонад.