НАХУСТИН ГУРӮҲИ ЗОЙИРИНИ ТОҶИК БА АРАБИСТОН МЕРАВАНД

Душанбе, 14 октябр.(АМИТ «Ховар», Марзия Саидова).-Соли равон беш аз 5 ҳазор зойирини Ҷумҳурии Тоҷикистон  ба зиёрати хонаи Худо рафта,  маросими ҳаҷҷи акбарро ба ҷо меоранд, ки 566 нафарашонро сокинони Душанбе ташкил медиҳанд. Дар ин хусус ба хабарнигори АМИТ «Ховар» мудири шӯъбаи равобити байналмилалӣ ва ҳаҷҷи Кумита оид ба корҳои дини назди Ҳукумати ҷумҳурӣ Абдуғаффор Юсуфов иттилоъ дод.       Мавсуф афзуд, ки сафари гурӯҳи нахустини шаҳрвандони Тоҷикистон ба Арабистони Саудӣ 24 октябр оғоз гардида, то 2 ноябр  идома меёбад. Дар соли  равон  хароҷоти маросими ҳаҷ  3 ҳазору 191 $ амрикоиро ташкил медиҳад, ки он нисбат ба соли гузашта 151 $ арзон мебошад. Ба он дохил мешавад чиптаи ҳавопаймо (1400 $), истиқомат ба муддати 30 рӯз дар меҳмонхона (1035 $),  пардохти боҷи шоҳӣ (275 $), хӯрокӣ (180 $), хизмати роҳбаладон (102 $),  хизмати корҳои Кумитаи дин (92 $),  маросими қурбонӣ (85 $). Синни шаҳрвандони ҷумҳурӣ, ки маросими ҳаҷро адо мекунанд,  аз 18 то 80 сола аст. Ба ҳар як гурӯҳ, ки аз 45 нафар зоирин иборат аст, 1 нафар роҳбалад рост меояд. Роҳбаладони зойирин намояндагони дину уламо буда, донандаи хуби амокини муқаддас ва забони арабӣ мебошанд.         А. Юсуфов афзуд, ки дар маросими ҳаҷҷи имсола шаҳрвандони Тоҷикистон тавассути ширкатҳои ҳавопаймоии ватанӣ,  ба мисли «Тоҷик-Эйр» ва «Сомон-Эйр» аз фурудгоҳҳои байналмилалии Душанбе ва шаҳри Хуҷанд тавассути хатсайрҳои Душанбе-Ҷидда ва Ҳуҷанд-  Ҷидда озими Арабистони Саудӣ мегарданд. Бозгашти зойирини тоҷик аз Арабистони Саудӣ ба Тоҷикистон аз 22 ноябр шурӯъ гардида,  7 декабр анҷом меёбад.