100 КОМПЮТЕР ДАР ХИЗМАТИ ХАБАРНИГОРОН

Душанбе, 25 ноябр.(АМИТ «Ховар», Дилшодаи Ҷонмард).-  Дар ин лаҳзаҳо  дар шаҳри Душанбе ҷаласаи Шӯрои сарони ҳукуматҳои давлатҳои узви Созмони Ҳамкориҳои Шанхай ҷараён дорад. Барои инъикоси оҷилии кори ин форуми муҳим ба пойтахти Тоҷикистон-шаҳри Душанбе зиёда аз 200 намояндаи Васоити ахбори оммаи байналмилалӣ омадаанд. Ба таври умум бошад кори ҷаласаи сарони ҳукуматҳои давлатҳои узви СҲШ-ро  қариб 500 нафар хабарнигорони маҳаллӣ ва хориҷӣ инъикос намуда истодаанд. Барои кори самараноки хабарнигорон ҷониби Тоҷикистон шароитҳои лозимиро муҳайё намудааст, аз ҷумла дар бинои Бонки Миллии Тоҷикистон маркази матбуотӣ ташкил шудааст. Ин марказ дар бинои нави Бонки Миллӣ, дар наздикии қароргоҳи шаҳрии Ҳукумати ҷумҳурӣ воқеъ аст ва барои намояндагони ВАО ниҳоят мувофиқ мебошад. Дар маркази матбуотии мазкур, ки  дар толори  васеъ  ҷой гирифтааст,  барои хабарнигорон ҷойҳои кории мувофиқ  омода гашта, 100 компютери ба интернет пайваст  дар хизмати онҳо қарор дорад. Алоқаи байналмилалӣ ва интернети баландсуръатро барои хабарнигорон  ширкати ватанӣ-Ҷамъияти саҳҳомии пӯшидаи «Вавилон-мобайл» пешниҳод намудааст. Зикр кардан бамаврид аст, ки дар маркази матбуотӣ монитор- ҳо ва телевизорҳои калон гузошта шудаанд ва  тавассути канали асосии ҷумҳурӣ -«Шабакаи аввал» хабарнигорон имконият доранд  бо рафти кори ҷаласа мустақиман  ошно гарданд. Хулоса, барои хабарнигорон тамоми шароити кору истироҳат муҳайёст.