ТАДБИҚИ КОРҲОИ ИЛМӢ ДАР ИСТЕҲСОЛОТИ КИШОВАРЗӢ

           Душанбе, 30 ноябр. (АМИТ «Ховар», Лаззат Диловарзод).- Бино ба гуфти президенти Академияи илмҳои кишоварзӣ Ҳукматулло Аҳмадов, натиҷаи корҳои илмию тадқиқотии олимони Пажӯҳишгоҳи зироаткорӣ дар минтақаҳои гуногуни ҷумҳурӣ ба таври васеъ ҷорӣ карда шудаанд.    Соли ҷорӣ навъҳои зироатҳои ғалладонагии селексияи Пажӯҳишгоҳи зироаткорӣ; гандуми навъи «Президент», «Ормон», «Сомонӣ», «Алекс», «Норман», «Садоқат», «Зироат — 70», «Ориён», «Наврӯз», «Ватан», «Шамъ», ҷави «Ифтихор — 86», «Баракат», «Пӯлодӣ» тритикалеи «Умед», «Акбар», «Умар» ҷавдори «Вахш — 128», «Вахш — 116»- ро дар майдони 130 ҳазор гектар кишт намуданд ва аз он  ҳосили дилхоҳ гирифтанд.     Олимони Пажӯҳишгоҳ навъҳои зироатҳои лӯбиёгии нахӯди «Муқтадир», «Зимистонӣ», «Ҳисор -32»,  наскҳои «Ҳисор -1», «Ҳисор — 5», мушунги хӯрокаи «Серҳосил», «Бадахшонӣ», «Лалмии — 126», моши «Тоҷикӣ — 1», «Тоҷикӣ — 2»- ро дар майдони 12 ҳазор га кишт намуда ҳосили зиёд рӯёниданд.    Бар замми ин,  дар кишти такрорӣ аз навъҳои гуногуни мош, лӯбиё ва марҷумак дар майдони 20 ҳазор га истифода намуданд, ки дар таъмини амнияти озуқаворӣ ва паст кардани сатҳи камбизоатии аҳолӣ хуб мусоидат хоҳад кард.