ҲАДЯИ ЭМОМАЛӢ РАҲМОН ДАР АРАФАИ СОЛИ НАВ

Душанбе, 8 декабр. (АМИТ «Ховар», Бекназари Абӯбакр). — Дар арафаи Соли нави милодӣ аз номи Президенти Ҷумҳурии Тоҷикистон Эмомалӣ Раҳмон ба толибилмони Мактаби президентӣ дар шаҳри Чкалов ду адад автобус ва як мошини боркаши «Газел» тақдим гардид. Ба ин муносибат раиси вилояти Суғд Қоҳир Расулзода ба мактаби мазкур ташриф оварда, аз номи Сарвари давлат калиди мошинҳои навро ба аҳли дабистон супорид. Мавриди зикр аст, ки ҳанӯз соли гузашта дар арафаи Иди Ваҳдати миллӣ, ҳангоми мавриди истифода қарор гирифтани ин дабистони илму маърифат  аз ҳисоби фонди захиравии Президенти мамлакат маблағ ҷудо гардида, ба масъулин барои харидорӣ намудани нақлиёт супориш дода шуда буд. Бояд тазаккур дод, ки бо дастуру ҳидоят ва дастгирии Сарвари давлат дар вилояти Суғд имрӯзҳо баҳри рушди соҳаи маориф бисёр корҳо ба сомон расонида шуда истодааст. Аз ҷумла, бо супориши Президенти мамлакат дар назди ин Мактаби президентӣ  аз оғози соли равон хобгоҳ низ бунёд мегардад. Ёдовар мешавем, ки Мактаби президентӣ дар шаҳри Чкалов дорои 26 синфхонаи мувофиқ ба меъёрҳои муосири таълим буда, ба 716 нафар хонанда  51 нафар омӯзгорон таълим медиҳанд. Мактаб ҳамчунин, дорои ошхонаи барҳаво, 3 синфхонаи компютерӣ, китобхонаи электронӣ ва дигар иншооти таълимӣ буда, барои хонандагон 21 маҳфилҳои гуногун амал мекунанд.