ДАЪВАТИ СИЁСАТМАДОРИ ШИНОХТА БА ФОРУМИ ЭКОЛОГӢ

        Душанбе, 17 декабр.(АМИТ «Ховар», Марзия Саидова).-«Апрели соли 2011 дар Ҷакарта бизнес –форуми байналмилалии экологӣ доир мешавад, ки ба  он дар радифи сарварони баландпояи кишварҳои ҷаҳон ва созмонҳои бонуфузи байналмилалӣ мо Президенти Ҷумҳурии Тоҷикистон Эмомалӣ Раҳмонро, ки борҳо аз минбари СММ ва дигар созмонҳои мӯътабари ҷаҳонӣ оид ба проблемаҳои глобалии экологӣ баромад намудааст, даъват менамоем». Ин матлабро раиси Шӯрои минтақавии намояндагони Индонезия Ирман Гусман зимни мулоқоти худ бо Раиси Маҷлиси  намояндагони  Маҷлиси Олии Ҷумҳурии Тоҷикистон Шукурҷон Зуҳуров зикр кард.        Ирман Гусман гуфт, ки иштироки чунин сиёсатмадори шинохта дар кори бизнес-форуми байналмилалии экологӣ  боиси ифтихори  созмондиҳандагони  ин нишаст аст.       Дар назар аст, ки дар бизнес-форуми экологии Индонезия Дабири кулли СММ, Президенти Бразилия, губернатори иёлоти Калифорнияи Амрико ва намояндагони дигар доираҳои баландпояи расмию тиҷоратӣ иштирок менамоянд.