КАЛОНТАРИН БОЗОРИ ДУШАНБЕ ТАХРИБ МЕГАРДАД

         Душанбе, 20  декабр.(АМИТ «Ховар», Марзия Саидова).-Яке аз собиқ бозорҳои калонтарини Душанбе бозори «Баракат», ки дар байни мардум бо номи «Путовский» маъмул аст, тахриб мешавад.     Дар робита шаҳрдории Душанбе ҷиҳати  бунёди  маркази савдои наву замонавии сеошёна тендер эълон менамояд.  Маркази нави савдо дар ҳудуди ҷамъияти саҳҳомии шакли пӯшидаи «Хиштрез», ки дар кӯчаи Сурхоб воқеъ гардидааст,  дар масоҳати 3,7 гектар бо ҷалби маблағҳои молии буҷаи  пойтахт ва соҳибкорони ватанӣ сохта мешавад.      Яке аз шартҳои тендер ҷиҳати сохтмони маркази нави замонавии савдо истифодаи масолеҳи сохтмонии бинои бозори «Баракат»   мебошад.       Мавриди зикр аст, ки бозори «Баракат, ки яке аз калонтарин бозорҳо дар даврони собиқ шӯравӣ дар пойтахт маҳсуб меёфт, мутобиқи нақшаи генералии шаҳри Душанбе охири моҳи январ бо қарори марбутаи шаҳрдории Душанбе тахриб мегардад.