ОҒОЗИ КОРҲОИ ПАРМАКУНИИ ЧОҲИ ГАЗ ДАР САРИҚАМИШ

Душанбе, 8 декабр. (АМИТ «Ховар», Людмила Дубинина). – Маросими ботантанаи оғози пармакунии аввалин чоҳи гази   ниҳоят амиқи «Шаҳринав-1п» рӯзи 7 декабр дар майдони Сариқамиши ноҳияи Шаҳринави Ҷумҳурии Тоҷикистон баргузор гардид.       Дар маросими мазкур вазири  энергетика ва саноати ҶТ Гул Шералӣ, сардори Сарраёсати геологияи назди Ҳукумати ҶТ  Азим Иброҳим, роҳбарони маъмурияти ноҳияи Шаҳринав, сарварону намояндагони  вазорату идораҳои марбута ва дигар шахсони расмӣ иштирок намуданд.     Директори намояндагии ҶСП «Газпром зарубежнефтегаз» Сергей Туманов ба  Ҳукумати Ҷумҳурии Тоҷикистон барои таваҷҷӯҳ ва дастгирии лоиҳаи мазкур  изҳори миннатдорӣ намуда, зикр намуд, ки онҳо на камтар аз Тоҷикистон барои бомуваффақият амалӣ шудани лоиҳаи мазкур ҳавасманданд ва умед доранд, ки дар ҷойҳои таҷрибагузаронӣ  баландшавии фишори газро ба даст меоранд.     Бояд гуфт, ки «Шаҳринав-1п» — нахустин чоҳи ҷустуҷӯии ниҳоят амиқи газ дар Ҷумҳурии Тоҷикистон ва Осиёи Марказӣ ба ҳисоб меравад. Чуқурии лоиҳавии он    6 300 метрро ташкил медиҳад.       Захираи гази ин мавзеъ тахминан 18 миллиард куб, захираи нафт 17 миллион тонна  ва гази моеи дохили нафти он  2 миллиард кубро  ташкил медиҳад.      Ҳаҷми   маблағгузории «Газпром» ҳангоми гузаронидани корҳои ҷустуҷӯӣ- иктишофӣ шурӯъ аз моҳи июни соли 2009 зиёда аз 1,5 миллиард рубли русиро ташкил медиҳад. Аз ҷумла  барои сохтмони чоҳ 550 миллион рубл ҷудо гардидааст.      Ёдовар мешавем, ки корҳои иктишофӣ дар майдони Сариқамиш 24 июни соли 2009 оғоз ёфта буд.       ҶСП «Газпром зарубежнефтегаз» корҳои ҷустуҷӯӣ-иктишофиро дар 4 майдони дорои нафту газ: Сариқамиш, Саргазон, Ренгон ва Шоҳамбарии ғарбӣ мегузаронад.