ШУМОРАИ МАЪЮБОНИ БЕМӮҲЛАТ ЗИЁД ШУД

Душанбе, 9 декабр. (АМИТ «Ховар», Лаззат Диловарзод).- Бино ба гуфти сардори Раёсати Хадамоти давлатии ташхиси тиббиву иҷтимоии Вазорати меҳнат ва ҳифзи иҷтимоии аҳолӣ Ғарибшо Сӯфишоев, имрӯз дар ҷумҳурӣ 152 ҳазору 240 нафар маъюб ба қайд гирифта шудааст, ки  беш аз 2 фоизи умумии аҳолии ҶТ- ро ташкил медиҳад.    Соли ҷорӣ 11ҳазору 891 шаҳрванд бори аввал барои гузаштан аз ташхиси тиббию иҷтимоӣ муроҷиат намуданд, ки ба 10 ҳазору 892 нафарашон гурӯҳи маъюбӣ дода шудааст. Аз беморони бори аввал муроҷиаткунанда,  шумораи маъюбони бемӯҳлат нисбат ба соли 2009 658 нафар зиёд гардидааст. Дар ин давра 21 ҳазору 962 нафар аз муоинаи такрорӣ гузаштанд, ки нисбат ба ҳамин давраи соли 2009 қариб 2 ҳазор нафар зиёд аст.