ТЕЪДОДИ ЯРМАРКАҲО МЕАФЗОЯД

         Душанбе, 3 декабр. (АМИТ «Ховар»,  Лутфия  Эшонқулова). – Имрӯз  дар  ноҳияи  Шоҳмансур  ярмаркаи  навбатии  31 – уми  ҷойи  кору  вазифаҳои  холӣ  баргузор  мегардад. Ташкилкунандаи  ярмарка  Агентии давлатии  ҳифзи  иҷтимоӣ,  шуғли  аҳолӣ  ва  муҳоҷирати  Вазорати  меҳнат  ва  ҳифзи  иҷтимоии  аҳолии  ҷумҳурӣ  мебошад.            Мухбири  АМИТ «Ховар»  хабар  медиҳад, ки дар  миқёси  мамлакат  аз  аввали  сол 523 ярмаркаи  ҷои  кору  вазифаҳои  холӣ  баргузор  гардид. Ин  нисбат ба  солҳои  гузашта  хеле  зиёд  мебошад. Ҳадафи  ярмаркаҳо  бо  кор таъмин  намудани  шаҳрвандони  бекори  мамлакат  аст. Ба туфайли онҳо  дар  давоми 11  моҳи  гузашта зиёда аз 4000  нафар  бо  кори  доимӣ  таъмин  карда шуд.         Дар  ин  муддат  танҳо  дар  шаҳри  Душанбе  30  ярмаркаи  ҷои  кору  вазифаҳои  холӣ  гузаронида шуд. Рӯзҳои  наздик  дар  пойтахти  мамлакат ярмаркаи  навбатӣ  гузаронида  мешавад. Дар  он  намояндагони  бештар  аз 40 корхонаю ташкилот ва  муассисаҳои  давлатӣ  ширкат  меварзанд. Онҳо  ба  корҷӯён  1719 ҷои  корро  пешниҳод  хоҳанд  кард.          Қобили  қайд аст, ки дар  қисми  зиёди  ярмаркаҳои  ҷои  кору  вазифаҳои  холӣ намояндагони  корхонаҳо,  ширкатҳо ва  муассисаҳои  истеҳсолии  Федератсияи  Русия  ва  мамлакатҳои  дигар  низ  ширкат  меварзанд.