ВОРИДОТИ 7920 ПАРВАНДАИ ҶИНОӢ БА СУДҲО

    Душанбе, 10 январ. (АМИТ «Ховар», Анварбек Сиддиқов). — « Дар соли 2010-ум 861 адад бекор намудани қарорҳои судӣ аз рӯи парвандаҳои ҷиноӣ, гражданӣ, маъмурӣ, иқтисодӣ ва дархостҳои мақомоти тафтиши пешакӣ ба қайд гирифта шуд. Омили асосии бекоршавии қарорҳои судӣ аз нопурра будани далелҳои тасдиқкунанда, сабукии ҷазо аз рӯи таъинот, баҳснокӣ, розӣ нашудан бо банду басти парвандаҳо иборат мебошад»,- иброз дошт раиси Шӯрои адлияи Ҷумҳурии Тоҷикистон Зафар Азизов дар нишасти матбуотие, ки 10 январ шуда гузашт.   Соли гузашта ба судҳои ҷумҳурӣ 7920 парвандаҳои ҷиноӣ ворид гардид. Аз ин шумора 7184 адади он моҳиятан баррасӣ гардида, аз онҳо 5928 адад нисбат ба 7491 судшаванда бо баровардани ҳукми айбдоркунанда ҳал шудааст,- гуфт раиси Шӯрои адлияи Ҷумҳурии Тоҷикистон.