БО «ИСТ ЭЙР» БА ҲИНДУСТОН МЕРАВЕМ

   Душанбе, 11 феврал. (АМИТ «Ховар», Марзия Саидова).- Ширкати ватании ҳавопаймоии «Ист Эйр» парвози мунтазамро байни шаҳрҳои Душанбе ва Деҳлӣ роҳандозӣ менамояд. Аз ширкати мазкур ба АМИТ «Ховар» иттилоъ доданд, ки 15 феврал соати 8.40 дақиқа ба вақти маҳаллӣ нахустин парвози мустақим бо тайёраи Boeing 737 аз фурудгоҳи байналмилалии Душанбе ба сӯи Деҳлӣ роҳ пеш мегирад.   Хатсайри нав ба Ҳиндустон ҳар ҳафта як маротиба рӯзи сешанбе сурат гирифта, нархи чиптаҳо аз Душанбе то Деҳлӣ 310 доллар ва аз Деҳлӣ ба Душанбе 322 доллар мебошад.   Мавриди зикр аст, ки ширкати ҳавонавардии «Ист Эйр» аз моҳи сентябри соли 2007 инҷониб фаъолият намуда, моҳи июни соли 2010 хатсайри мунтазами Кӯлоб –Маскав- Кӯлобро ба роҳ монд.    Ширкати ҳавонавардии «Ист Эйр» тасмим гирифтааст, ки дар ояндаи наздик хатсайрҳои Кӯлоб — Санкт-Петербург, Кӯлоб-Екатеринбург ва Душанбе- Исломободро ба роҳ монад.