ХУРСАНД БО ГЕРОИН ДАСТГИР ГАРДИД

  Душанбе, 10 феврал. (АМИТ «Ховар», Анварбек Сиддиқов). – Кормандони мақомоти корҳои дохилӣ дар шаҳри Душанбе истиқоматкунандаи ноҳияи Ишкошим, соли таваллудаш 1985 Хурсанди Алидодро бо ҷурми даст доштан дар интиқоли маводи нашъадор боздошт намуданд.   Тавре аз маркази матбуоти ВКД-и Ҷумҳурии Тоҷикистон ба АМИТ «Ховар» иттилоъ доданд, маводи нашъаовар аз борхалтаи дастии боздоштшуда ёфт ва мусодира гардид.   Мувофиқи ташхиси озмоишӣ маводи мусодирашуда навъи героин буда, вазнаш 9 килограмму 14 граммро ташкил дод.  Нисбат ба қонуншикан мувофиқи моддаи 200-уми Кодекси Ҷиноии Ҷумҳурии Тоҷикистон парвандаи ҷиноӣ оғоз гардида, тафтиш идома дорад,- хабар дод манбаъ.