АЁДАТИ СОБИҚАДОРОНИ МАТБУОТ

Душанбе, 11 март. (АМИТ «Ховар», Бекназари Абӯбакр). — Ҳамасола дар Ҷумҳурии Тоҷикистон 11 март ҳамчун Рӯзи матбуоти тоҷик таҷлил мегардад. Чун анъана, дар арафаи ин ҷашн аз тарафи вазорату идора ва ташкилоту муассисаҳои давлатӣ собиқадорони соҳа бо тӯҳфаҳо  қадрдонӣ мешаванд. Тибқи нақшаи чорабиниҳои  мақомоти иҷроияи ҳокимияти давлатии вилояти Суғд  ба муносибати Рӯзи матбуоти тоҷик 26 нафар собиқадорони матбуот ва кормандони нашриёт, муассисаҳои табъу нашр аёдат шуда, барояшон тӯҳфаҳои яквақтаи раиси вилояти Суғд тақдим гардид.       Роҳбари хадамоти матбуоти раиси вилоят Мухтор Абдуллоев бо аъзои раёсати вилоятии  Иттифоқи журналистони Тоҷикистон  ба манзили зисти  собиқадорони  рӯзномаи «Ҳақиқати Суғд» Исроилҷон Исмоилов, Абдумуин Маҷидов, собиқадори  рӯзномаи «Суғд ҳақиқати» Авлиёхон Шукруллоев, собиқадорони  рӯзномаи «Согдийская правда» Анна Колосова, Владимир Тарасов ва собиқадорони   матбуот Хайринисо Ҷӯраева, Эркинҷон Аҳмадов ва Маҳмудҷон  Бобоҷонов рафта, дар баробари муборакбодӣ бо иди матбуоти тоҷик ба онҳо  аз номи раиси вилоят тӯҳфа супориданд.