ИНЪИКОСИ ВОҚЕЪИЯТ ДАР НАШРИЯҲОИ ВИЛОЯТ

Хоруғ,  11 март. (АМИТ «Ховар», Л.Додо). –  11 – уми   март дар  ҷумҳурӣ  рӯзи  матбуот эълон  шудааст. Тавре раиси  Иттиҳодияи  журналистони  вилоят  Алимаҳмад  Муродмаҳмадов  зимни сӯҳбат бо хабарнигори АМИТ «Ховар» иброз намуд, дар  ВМКБ  имрӯз  як  нашрияи  давлатию  вилоятӣ, 8  адад нашрияи шаҳрию  ноҳиявӣ ва  3  адад нашрияи  мустақил  фаъолият  доранд, ки  хонандагонро  бо  ҳаёти  сиёсиву  иҷтимоии вилоят  шинос  менамоянд.  Албатта,  дар  шароити  иқтисоди  бозаргонӣ  барои  матбуоти  музофотӣ,  ба  вижа  дар мавзеъҳои  кӯҳистон  барои рӯзномаҳои  ноҳиявӣ фаъолият  намудан душвор  аст. Ба  ин  нигоҳ  накарда,  бо кӯмаки  мақомоти  маҳаллии  ҳокимияти   давлатии  вилоят онҳо  фаълият доранд.  Миёни  рӯзноманигорони  вилоят  ду  нафар- Қурбони  Аламшоҳ  ва  Луфишоҳи  Додо  сазовори  ҷоизаи   ба  номи  Абулқосими  Лоҳутӣ  ва    15  нафар  Аълочии  матбуот ҳастанд. Рӯзноманигорони   вилоят  масъулияти  худро   дар  назди  миллату  Ҳукумати  Ҷумҳурӣ  хуб  дарк  намуда ба  он  мекӯшанд, ки  барои сари  вақт  расонидани  хабарҳои  тоза  ва  шаффоф   инъикос   намудани  ҳаёти  ҷомеа  корҳои  назаррасро анҷом   диҳанд, афзуд Алимаҳмад Муродмаҳмадов.