КУРСҲОИ ОМӮЗИШӢ БАРОИ КОРМАНДОНИ БДА

Душанбе, 3 март. (АМИТ «Ховар», Пайрав Назаров). – Сафорати ИМА дар Тоҷикистон дар ҳамкорӣ бо ташкилоти байналмилалии ҷамъиятии «Гурӯҳи Эмерҷенс» се курси ду ҳафтаинаи омӯзиширо барои кормандони Бозрасии давлатии автомобилии Вазорати корҳои дохилии ҷумҳурӣ гузаронид. Курсҳои омӯзишӣ дар моҳҳои декабр, январ ва феврал барои  45 нафар корманди милиса аз тамоми ҳудуди ҷумҳурӣ доир гардиданд.  25 феврал курси сеюм ва дар айни замон охирини даври омӯзишӣ ба охир расид. Чаҳордаҳ нафар корманди Бозрасии давлатии автомобилӣ аз вилоятҳои Хатлон, Суғд,  ВМКБ, навоҳии тобеи ҷумҳурӣ ва шаҳри Душанбе  курси дуҳафтаинаи дар муддати кӯтоҳ омодасозии нозирони ояндаро бомуваффақият ба анҷом расониданд.       Иштирокдорони курсҳои мазкур зимни омӯзиш таҷрибаи ба ҳолатҳои гуногуни бӯҳронӣ мутобиқ намудан  ва муҳофизати худ аз ҳама гуна хатарҳоро ҳосил намуданд. Зимни баргузории тренинг ба кормандони БДА кор бо ҷамъият барои мустаҳкам намудани муҳофизатро омӯзонида, ҳамчунин, таҷрибаи онҳоро дар самти расонидани кӯмаки аввалину таъҷилии тиббӣ  ва машқҳои худмуҳофизатии онҳоро мукаммал гардониданд.