МАРКАЗЕ, КИ БО ЛОЙ ТАБОБАТ МЕКУНАД

Кӯлоб,  17 март. (АМИТ «Ховар»,  С.Холов). –   Дар  арафаи  ҷашни  байналмиллалии  Наврӯз   дар  беморхонаи  вилоятии  №2 – и  шаҳри  Кӯлоб  боз  як  маркази  табобатии  физиотерапевтӣ  ба  фаъолият шурӯъ   намуд.   Дар  маркази  мазкур, ки дар  таҳхонаи  бинои  беморхона ҷойгир  шудааст,  мизоҷон имконият доранд   аз асбобҳои  барқӣ  барои  варзишу обутоб   додани  бадан,  ҳамчунин, аз электрофарез, парафин ва  лойи  табобатӣ  истифода намоянд. Бояд гуфт, ки дар  маркази мазкур дар як навбат   беш  аз  35  нафар   шаҳрвандон ба табобат фаро гирифта шуда  аз  хизматрасонии  маркази  мазкур   баҳра мебардоранд. Ҳамчунин,  самти   дигари  маркази  физиотерапевтӣ ба табобати  кӯдакони  гирифтори   бемориҳои  гуногуни  системаи  асаб  ва  фалаҷ  равона гардидааст. Дар назар аст, ки    барои боз  ҳам  беҳтар   намудани  сатҳу  сифати  хизматрасонии тиббӣ дар беморхонаи мазкур тибқи нақша  нуқтаҳои   дигари  тибобатӣ ба  истифода  дода  мешаванд.