Имомҳои Душанбею Роғун аз санҷиш мегузаранд

Душанбе, 12 июл.(АМИТ «Ховар», Марзия Саидова).-39 нафар сархатибон ва имомхатибони масҷидҳои ҷомеи марказӣ ва ҷомеи шаҳру ноҳияҳои ҷумҳурӣ аз санҷиш нагузаштанд. Дар маҷмӯъ, дар санҷиш 327 нафар сархатибону имомхатибони масҷидҳои ҷомеи марказӣ ва ҷомеи шаҳру ноҳияҳои ҷумҳурӣ ширкат намуданд. Назар ба иттилои раиси Кумитаи оид ба корҳои дини назди ҳукумати ҷумҳурӣ Абдураҳим Холиқов комиссияи санҷишӣ аз ҳисоби уламои Маркази исломӣ, кормандони Дастгоҳи иҷроияи Президенти ҷумҳурӣ ва Кумита оид ба корҳои дини назди ҳукумати ҷумҳурӣ таъсис ёфта буд.Ҳамзамон, аз ҷониби комиссияи мувофиқанамоӣ дар давраи ҳисоботӣ 95% имомони масҷидҳои панҷвақта аз мувофиқа гузаштанд. Зикр шуд, ки дар ҷумҳурӣ 3 ҳазору 347 масҷиди панҷвақта фаъолият дошта, имомони 2 ҳазору 902 масҷид ба раванди мувофиқа фаро гирифта шуданд, ки 2 ҳазору 835 нафар имомон аз санҷиш бомуваффақият гузашта, 67 нафарашон ноком гардиданд. Бо сабабҳои гуногун 373 имом дар санҷиш ширкат накарданд. Ҳамзамон, санҷиши 72 нафар имомони масҷидҳои панҷвақтаи шаҳрҳои Душанбе ва Роғун дар ҳоли идома аст.Зикр шуд, ки инчунин дар ин давра санҷиши кормандони шӯъба ва бахшҳо оид ба корҳои дини мақомоти иҷроияи ҳокимияти давлатии вилоятҳо ва шаҳру ноҳияҳои кишвар ба анҷом расид.