Оғози моҳи шарифи Рамазон муқаррар гардид

Душанбе, 25 июл.(АМИТ «Ховар», Марзия Саидова).- 1 августи соли равон дар Тоҷикистон чун дар дигар кишварҳои мусулмонии ҷаҳон моҳи мубораки Рамазон оғоз меёбад. Оғози санаи моҳи шарифи  Рамазон дар асоси қарори ҷаласаи Шӯрои уламои Ҷумҳурии Тоҷикистон, ки 25 июл бо иштироки намояндагони  уламои  ҷумҳурӣ, имомхатибони шаҳру ноҳияҳои кишвар дар Душанбе таҳти раёсати Раиси Маркази исломии Тоҷикистон Саидмукаррам Абдулқодирзода баргузор гардид, муайян шуд.Оғози моҳи мубораки Рамазон дар асоси хулосаи олимони Пажӯҳишгоҳи астрофизикаи Академияи улуми ҷумҳурӣ  ва марказҳои исломии кишварҳои дигари минтақа муқаррар гардидааст. Дар ин хусус ба АМИТ «Ховар» аз Маркази исломии Тоҷикистон иттилоъ доданд. Моҳи шарифи Рамазон аз ҷумлаи моҳҳои солшумории ҳиҷрии қамарист ва дар тақвими исломӣ баъд аз моҳи шаъбон меояд.Дар моҳи Рамазон мусулмонон рӯза медоранд, тоату ибодат менамоянд ва ба қироати Қуръони азимушшаън машғул гардида, қалби худро  аз кинаву кудурат, ҳасад,  дурӯғ  ва дигар амалҳои зишт пок сохта, ба кирдорҳои ғайришаръӣ,  хусусан авомфиребӣ даст намезананд. Хайру эҳсон ба  ятимону барҷомондагон  ва мардуми камбизоат  яке аз рисолатҳои моҳи шарифи Рамазон аст. Зеро як амали нек баробар ба як амали фарз аст ва як амали фарз баробар  бар 70 амали фарз аст.