Сафари Эмомалӣ Раҳмон ба Турсунзода ва Шаҳринав

Душанбе, 22 июл. (АМИТ«Ховар», Дилшодаи Хайруллоҳ). — Субҳи имрӯз Президенти кишвар Эмомалӣ Раҳмон ба ноҳияҳои Турсунзода ва Шаҳринав сафари корӣ оғоз кард. Мақсади сафар шиносоӣ бо рафти сохтмони иншооти ҷашнӣ дар навоҳии номбурда мебошад. Сарвари давлат Эмомалӣ Раҳмон дар расми ифтитоҳи мактаби таҳсилоти миёнаи умумии № 73 деҳаи Галаботури шаҳри Турсунзода иштирок намуда, лентаи рамзиро бурид. Бояд гуфт, ки таълимгоҳ аз се бинои дуошёна иборат буда, барои 640 ҷойи нишаст пешбинӣ шудааст. Аз ҷумла, он аз 16 синфхонаи таълимӣ, 2 утоқи озмоишӣ, 2 синфхонаи компютерӣ, китобхона, ошхона, толори маҷлис, толори варзишӣ ва майдончаи варзишӣ иборат аст. Барои сохтмони ин таълимгоҳ 6 миллион сомонӣ сарф шудааст.Ёдовар мешавем, ки сохтмони мактаб моҳи апрели соли 2008 оғоз ёфта буд.Президенти кишвар Эмомалӣ Раҳмон зимни суханронӣ дар мактаби мазкур ба сохтмончиёни он изҳори миннатдорӣ намуда, пешниҳод кард, ки номи деҳаи Галаботур ба Истиқлол иваз шавад. Сафари Президенти кишвар дар ноҳияи Турсунзода идома дорад.