Тоҷикистон қувваи барқи зиёдатиро мефурӯшад

Душанбе, 28 июл. (АМИТ «Ховар», Кристина Эрлих). – ШСХК «Барқи Тоҷик» тайи шаш моҳи соли равон 6 миллиарду 799 миллион киловатт – соат қувваи барқ тавлид намуд, ки ин назар ба ҳамин давраи соли гузашта 70 миллион киловатт – соат зиёд аст. Дар ҳамин давра талафи технологии қувваи барқ 1 миллиарду 158 миллион киловатт – соатро ташкил дод, ки назар ба ҳамин давраи соли гузашта 47,2 миллион киловатт кам мебошад. Раиси ШСХК «Барқи Тоҷик» Абдулло Ёров дар нишасти матбуотӣ аз рӯи натиҷаи фаъолият дар нимаи аввали соли 2011, ки 27 июл баргузор гардид, рақамҳои зикршударо мисол овард. Абдулло Ёров ҷавобан ба саволҳои журналистон гуфт, ки ҳоло Лоиҳаи Қарори Ҳукумати Ҷумҳурии Тоҷикистон дар бораи тағйири сохтори ширкат таҳия шудааст. Лоиҳаро вазорату идораҳои дахлдори мамлакат маъқул ёфта ва барои муҳокимаи он дар Ҳукумати ҶТ тавсия намудаанд.Дар мавриди масъалаи судури қувваи зиёдатии барқ зикр шуд, ки Тоҷикистон қувваи барқро ба воситаи хати баландшиддати 220 киловаттаи «Сангтӯда – Пули Хумрӣ», ки сохтмони он моҳи майи соли ҷорӣ пурра анҷом ёфт, ба Афғонистон интиқол доданист.Дар заминаи ин шартнома моҳҳои август ва сентябри соли равон интиқоли таносубан 20 ва 25 миллион киловатт – соат қувваи барқ оғоз меёбад. Абдулло Ёров зикр намуд, ки дар фасли зимистон ва, алалхусус ҳангоми ҷорӣ намудани реҷаи истифодаи қувваи барқ дар Тоҷикистон, ба Афғонистон қувваи барқ дода намешавад. ШСХК «Барқи Тоҷик» корро барои эъмори нерӯгоҳҳои хурди барқ ҷиҳати таъмини минтақаҳои дурдасти ҷумҳурӣ бо қувваи барқ давом медиҳад.