Замин – моликияти истисноии давлат

Душанбе, 15 июл. (АМИТ «Ховар», Анварбек Сиддиқов).- «Ҷиноятҳои вобаста ба хариду фурӯши ғайриқонунунии замин дар шаш моҳи соли ҷорӣ дар ҷумҳурӣ зиёд гардидааст»,- гуфт раиси Суди олии Ҷумҳурии Тоҷикистон Нусратулло Абдуллоев дар нишасти матбуотие, ки 15 июл дар шаҳри Душанбе баргузор гардид. Номбурда иброз дошт, ки замин моликияти истисноии давлат маҳсуб мешавад. Дар нимаи аввали соли 2011 дар Суди олии ҷумҳурӣ 66 парвандаи ҷиноӣ нисбати зиёда аз 70 нафар қонуншикан мавриди баррасӣ гардидааст.Ҳамчунин дар ин давра ба мақомоти Суди олӣ 1352 арзу шикоятҳои шаҳвандон ворид гардидааст, ки аз ин миқдор 465 шикоят марбут ба парвандаҳои ҷиноӣ, 673 парвандаҳои шаҳрвандӣ, 198- то ба парвандаҳои оилавӣ ва 16- тоаш парвандаҳои маъмурӣ буда, 85, 5 фоизи онҳо ҳаллу фасл гардиданд. Ин аз он шаҳодат медиҳад, ки сатҳи маънавиёти ҳуқуқии мардуми кишвар сол то сол боло меравад, арзёбӣ намуд Нусратулло Абдуллоев.