Ҳамкории шаҳрвандон бо мақомоти маҳаллии ҳокимият

Душанбе, 18 август (АМИТ «Ховар», Кристина Эрлих). – Бо мадади молиявии Агентии рушди байналмилалӣ (USAID) дар Тоҷикистон барномаи сесолаи минтақавӣ ҷиҳати расонидани кӯмак ба ибтикороти маҳаллию деҳотии рушд роҳандозӣ карда мешавад. «Мақсад аз ин барнома дар сатҳи миллӣ иборат аз беҳтар намудани қонунгузорӣ бо мақсади афзун намудани самарабахшӣ ва демократикунонии идораи давлатии маҳалҳо мебошад», — зикр намуданд ба хабарнигори АМИТ «Ховар» дар намояндагии (USAID) дар Тоҷикистон.Дар чаҳорчӯбаи татбиқи барнома дар ҳамаи мақомоти маҳаллии минтақаҳои Тоҷикистон тадбирҳо андешида мешаванд, ки ин ба беҳдошти фаъолияти мақомоти маҳаллӣ барои идораи самарабахшу демократӣ, инчунин ҷиҳати баланд бардоштани қобилияти шаҳрвандон дар амри ҳамкорӣ бо мақомоти маҳаллӣ мусоидат мекунад.Барномаи минтақавӣ, ки маблағи умумиаш беш аз 13 миллион доллари ИМА – ро ташкил медиҳад, ҳамчунин дар Қазоқистон, Туркманистон ва Ӯзбекистон рӯи кор оварда мешавад.