200 адад таҷҳизоти барқи офтобӣ тӯҳфа ба мардуми кӯҳистон

Душанбе, 12 август. (АМИТ «Ховар», Мавзуна Бойева).- Боз 200 адад таҷҳизоти барқи офтобӣ дастраси сокинони минтақаҳои кӯҳистон гардид. Ин навбат ба аҳолӣ ва муассисаҳои иҷтимоии деҳаҳои ҷамоати деҳоти Сағирдашти ноҳияи Дарвоз 100 адад ва деҳаҳои Сари Камар, Мавлак, Олиҷгон, Санги Ҷувозак, Шаҳтут, кӯчаи Яхпули Тутқавул, Калтачинори шаҳри Норак 100 адад таҷҳизоти барқи офтобӣ тақсим гардид. Тавре қаблан иттилоъ дода будем, бо ташаббусу дастгирии Президенти мамлакат Эмомалӣ Раҳмон бахшида ба 20- солагии Истиқлолияти давлатии Ҷумҳурии Тоҷикистон Вазорати энергетика ва саноати ҷумҳурӣ дар доираи ҳамкориҳо ва муносибатҳои хориҷӣ бо кишвару созмонҳо ва ширкатҳо ба ҷумҳурӣ зиёда аз 2 ҳазор даста таҷҳизоти барқи офтобӣ ворид намуда буд. Тавре аз шӯъбаи котиботи Вазорати энергетика ва саноати Ҷумҳурии Тоҷикистон ба АМИТ «Ховар» иттилоъ доданд, то имрӯз ба сокинони ноҳияи Айнӣ 85 адад, Кӯҳистони Мастчоҳ 40, Балҷувон 100, Ховалинг 100, шаҳри Норак 100 ва ба ноҳияҳои ВМБК 1,6 ҳазор таҷҳизоти барқи офтобӣ тақсим карда шуд.