Баррасии қонуни IDRL дар Остона

Душанбе, 15 август.(АМИТ «Ховар», Марзия Саидова).-Як ҳайати Ҷумҳурии Тоҷикистон иборат аз масъулони Вазорати корҳои хориҷа, нерӯҳои марзбонӣ, Агентии сохтмон ва меъморӣ, Хадамоти гумрук, Кумитаи ҳолатҳои фавқулодда, Ҷамъияти Ҳилоли Аҳмари Тоҷикистон, намояндагиҳои Барномаи рушди СММ (БР СММ) ва Федератсияи байналмилалии ҷамъиятҳои Салиби Сурх ва Ҳилоли Аҳмар (ФБҶ СС ва ҲА) дар Тоҷикистон ба шаҳри Остона сафар мекунад. Ин ҳайат Тоҷикистонро дар конфронсе, ки рӯзҳои 17-18 август дар Остона дар мавзӯи «Таҳия ва тақвияти асоси қонунии вокуниш ба ҳолатҳои фавқулодда» баргузор мегардад, намояндагӣ мекунад. Ҳайат қабл аз сафар дар Душанбе ҷамъ омада, масъалаҳои марбут ба ин нишаст ва вазъи қонунҳои Тоҷикистон дар ҳолатҳои фавқулоддаро баррасӣ кард. Ҳамоҳангсози барномаҳои мудирияти ҳолатҳои фавқулоддаи Федератсияи байналмилалӣ дар минтақаи Осиёи Марказӣ Шамсуддин Муҳиддинов роҷеъ ба аҳамияти нишасти Остона махсус таъкид карда, гуфт, ки ин нишаст бо ибтикори Федератсияи байналмилалӣ дар ҳамкорӣ бо Ҷамъияти Ҳилоли Аҳмари Қазоқистон ва дигар созмонҳои байналмилалӣ, бо маблағгузории Комиссияи аврупоӣ баргузор мешавад. Ин дуввумин нишаст буда, ҳадафаш баррасӣ ва тақвияти қонунгузории ҷумҳуриҳои Осиёи Марказӣ дар ҳолатҳои изтирорӣ аст. «Мавзӯи фаъолияти созмонҳои башардӯстона, фаъолияти мададгорон, овардан ва тақсими ёриҳои башардӯстона дар кишвари офатзада имрӯз яке аз мавзӯъҳои муҳим мебошад. Борҳо дар ҷаҳон ҳодисаҳое шудааст, ки бо рух додани офати табиӣ набуди заминаи қонунии фаъолияти ёрирасонҳо ва ироаи ёриҳои башардӯстона боиси мушкилот гардидааст», — тазаккур дод Ш. Муҳиддинов. Интизор меравад, ки ҳайати Тоҷикистон баъд аз бозгашт дар тарғиби Қонуни байналмилалии вокуниш ба ҳолатҳои фавқулодда (IDRL) дар Тоҷикистон саҳм гузорад.