Ганҷинае, ки дар Осиёи Марказӣ беназир аст

Душанбе, 3 август.(АМИТ «Ховар», Марзия Саидова).- 308 адад дастхату китобҳои чопи сангӣ аз китобхонаи ба номи Тошхоҷа Асирии шаҳри Хуҷанд ба Китобхонаи миллии ҷумҳурӣ супорида шуд. Дастхату китобҳои мазкур мутаалиқ ба асрҳои 14-19 буда ва бо мақсади мукаммал гардонидани фонди Китобхонаи миллии ҷумҳурӣ ба ин махзан интиқол дода шудааст.Мавриди зикр аст, ки бунёди бинои нави Китобхонаи миллӣ, ки он дар остонаи ҷашни 20-умин солгарди Истиқлолияти давлатии Ҷумҳурии Тоҷикистон ба истифода дода мешавад, аз лиҳози масоҳат, гунҷоиши фонди китобӣ, фарогирии хадамоти китобдорӣ дар Осиёи Марказӣ беназир аст. Бинои нави Китобхонаи миллӣ бо масоҳати умумии беш аз 44 ҳазор метри мураббаъ сохта шуда, қисми «А»-и бино аз 9 ошёна, қисми «Б» ва «В» 6 ошёна ва қисмати «Г»-аш аз 4 ошёна иборат мебошад. Алҳол корҳои сохтмонӣ дар ин иншооти бузурги ҷашнӣ босуръат идома дорад. Бояд тазаккур дод, ки хишти нахустини бинои Китобхонаи миллӣ чор сол муқаддам – 4 сентябри соли 2007 аз ҷониби Президенти ҷумҳурӣ Эмомалӣ Раҳмон гузошта шуда буд..